人幫你, 你幫人走出社交孤立

人生路不熟，點識朋友？W媽媽與仔仔同老公剛慶祝移英兩周年，同大家分享自己的經歷。
初來英國，仔仔面對唔少適應困難，讀寫聽說，返學日日頭頂都有十萬個問號。W媽媽唔想仔仔黎到英國都係追成績、追功課……但又會擔心將來GCSE 英文唔合格，出路不多。

人生路不熟，媽媽聯絡心泉的義工了解英國對SEN學生嘅支援，同時又了解多左16+出路。這年來W媽媽一方面鼓勵仔仔學好英文，另一方面又帶仔仔參觀區內提供職業導向課程嘅學校，讓仔仔向老師了解收生要求之餘，也可早日訂立升學方向。

媽媽一直有參加心泉每個月嘅家長吹水會，同其他家長分享各種適應英國新生活嘅小智慧如揸車小貼士、同鄰居相處之道、參加本地義工體驗…..當然也會分享遇過種種嘅不平事，齊齊變身「憤怒鳥」。
最近W媽媽分享做義工嘅經驗，佢同老公參加左當地 Repair Cafe 嘅活動，幫街坊維修物品。既可為環保出一分力，亦都同社區一點一滴建立聯繫。短短三小時，就完成5項小維修如修理風筒等，略盡棉力，大家開心。

有人話，初來報到，又多嘢煩，又無人無物，真係人都癲。
同香港人圍吓爐，同聲同氣，少一份孤單感就多一分力量。認識本地同事、鄰居或朋友，接觸不同文化，在文化差異中慢慢認識移居地，也是融入嘅重要一步。

移民係好多香港人人生最勇嘅決定，移居後嘅困難都係要憑心口一個「勇」字，關關難過，但總有人陪你過。